Vir die wat nog nie weet nie: soos Vaalwater in Limpopo ’n skaapkopgilde het, het Oudtshoorn ’n viskopgilde wat ’n paar keer ’n jaar byeenkom en dan viskoppe, meestal kabeljou, eet wanneer hulle dit in die hande kan kry. Vandeesmaand het (van links) Stoffel Prinsloo, Anthony Still, Johan Smit, Hans Babst, Leon Strydom en Kobus Spies, wat die viskoppe in die oond bak, saam geëet. Met ’n glasie wyn was dit duidelik dat die viskopeters hulle gate uit geniet het!

’n Reuse-hyskraan is verlede week gehuur om die staalstrukture waaraan die dak van die nuwe pawiljoen by die Bridgton Sportgronde vasgemaak word, in plek te kry. Die strukture weeg ’n tamaai 2 ton elk.

Die Eurythmic School of Dancing spog met hul vele oorwinnings by die SWD-danskompetisie te Oudsthoorn. Hulle het eerste-, tweede, derde- en vierdeplekke behaal. Hulle koördineerder, me Katy Britz sê hul oorwinning is grootlik te danke aan die afgelope Absa KKNK wat dit moontlik gemaak het om professionele opleiding deur mnr Melvin Letsape te ontvang. Hierdie is die kinders wat deelgeneem het.

MNR EN MEJ GIM GLANSAAND. Langenhoven Gimnasium se Mnr en Mej Gim 2013 is Saterdagaand tydens ’n glansgeleentheid aangewys waar die gaskunstenaar die sanger David Fourie was! Hier van links voor is Franja Genis (eerste prinses en Mej Fotogenies), Elandi Erasmus (Mej Gim), Rico Bence (Mnr Gim) en Guidor du Preez (eerste prins en Mnr Fotogenies). Agter van links staan Mart-Marie Truter (Mej Persoonlikheid), Ezetjé Greeff (tweede prinses), Jonty van Rooyen (tweede prins), Charl Kemp (Mnr Persoonlikheid) en Jakkie Botes (Mnr Debutant).

MNR EN MEJ STRUISIE AANGEWYS. Die Hoërskool Oudtshoorn se Mnr en Mej Struisie is verlede Woensdag (24 April) tydens ’n glansaand by die skool gehou, aangewys. Hulle is Jason Carlisle en Mia le Roux (voor). Mia is ook aangewys as Mej Fotogenies. Die ander wenners was agter van links Mihan Fourie (Mnr Persoonlikheid), Jayden Onkers (tweede prins), Hentie Victor (eerste prins), Emma-Leigh Beets (eerste prinses), Tracy Wagenaar (tweede prinses en Mej Persoonlikheid) en Sebastian Herselman (Mnr Fotogenies).

FOURIES KUIER SAAM. ’n Groot en vrolike reünie van die familie van mnr Gert Fourie het einde Maart op De Hoop buite Oudtshoorn plaasgevind. Mnr Fourie is een van 12 kinders, waarvan 10 nog leef. Nege van die broers en susters met hul kinders en kleinkinders het van Vredenburg, Kaapstad, Worcester, Mosselbaai en Oudtshoorn vir die reünie opgedaag, en 50 familielede het in ’n stadium saamgekuier. Die hoogtepunt was ’n rit per bus vanaf De Hoop tot by Warmbad waar die jonger familielede kon sien waar oupa- en oumagrootjie geboer het. Nog ’n hoogtepunt was die saamdans tot middernag met ’n boereorkes bestaande uit drie van die broers en twee kleinkinders!

Vier se reis na gister
Dié vier vriendinne wat in 1955 saam matriek geskryf het by die Hoër Meisieskool op Oudtshoorn, het verlede week vir die eerste keer weer saam gekuier. Die skool was destyds in Baron van Reedestraat geleë. Drie van hulle het na jare weer na Oudtshoorn teruggekeer en woon nou hier. Die vierde, wat nou in Pretoria woonagtig is, het vir hulle kom kuier. Voor van links sit mes Deborah Kruger (neé Schoeman) en Dorothy Bekker (neé Nel). Bekker bly tans in Pretoria. Agter van links staan mes Anita Grobler (neé Engelbrecht) en Maria Viljoen (neé Swart).

Die tydtoets vir die veteraanmans 30-34, wat deel vorm van die SA Veteraanfietsrykampioenskap wat vandeesweek op en om Oudtshoorn plaasvind, het Woensdagoggend in die ingang van die Kangogrotte begin.

Laetitia Lourens, ’n leerder van Langenhoven Gimnasium, wat vir die derde jaar in ’n ry SA kleure in tennis verwerf het. Sy is ook deel van die SWD-seniorspan. Laetitia gaan gedurende Junie/Julie in Skotland deelneem.

Die bekende kunstenaars Jannie du Toit (regs) en Lochner de Kock (middel) het Saterdag by die laaste vertoning van Die Courdon Broers se kossêrt waarin hulle daagliks by die KKNK te sien was, ’n donasie van R1 800 aan Huis Triomf op Oudtshoorn oorhandig.
By hulle is mnr Alie Killian, tesourier van Huis Triomf. Die geld is ingesamel met ’n gereg wat Lochner elke dag voorberei het en wat dan aan die gehoor opgeveil is.

Mnr Danie Maart, koördineerder: borge van die Absa KKNK , het verlede Vrydag-oggend die eerste hoekpen vir die markiestente vir die 19de Absa KKNK op Oudtshoorn ingekap. Vanjaar se Absa KKNK begin op 29 Maart en duur tot 6 April. Die tente word opgerig op die terrein van die Absa Kunsmark, net langs die Oudtshoorn Rolbalklub in St Johnastraat. By Maart staan van links mnre Rudi du Toit, logistieke bestuurder, Nico Uys, sekuriteitstoesighouer, William de Bruyn, koördineerder VOS, en Isaac Pillay, koördineerder: venues en terreine.

’n Afvaardiging uit die Oekraïene het Ladismith, Vanwyksdorp, Calitzdorp en Oudtshoorn die week as deel van ’n studiebesoek aan die Eden Distrik aangedoen. Hulle besoek ook nog onder meer George en Wildernis. Hier Dinsdagaand by ’n onthaal by Buffelsdrift was van links mnr Oleksandr Korinnyi (burgemeester van Novoukzainka), me Maria Vynnytska wat as tolk opgetree het, en mnre Gordon April (burgemeester van die Groter Oudtshoorn) en Pavlo Kozyrev (burgemeester van Ukrainka).