Christo Kemp, skeidsregter in Saterdag se wedstryd tussen Oudtshoorn en Calitzdorp, lê met rooikaart nog in die hand op die grond tussen die spelers se voete. Hy is na bewering te lyf gegaan nadat hy die kaart aan een van Calitzdorp se spelers gewys het.
Foto: Adri Viljoen.

DIE SWD-Presidentsligawedstryd tussen die eerste rugbyspanne van Oudtshoorn en Calitzdorp Saterdag op die Rec op Oudtshoorn is vroeg in die tweede helfte beëindig nadat die skeidsregter na bewering aangerand is. Oudtshoorn het in daardie stadium 22-7 voorgeloop.

Die voorval het kort voor die middel van die tweede helfte gebeur toe die skeidsregter, Christo Kemp, ’n rooikaart gewys het aan Calitzdorp se plaasvervangeragtsteman, Rico Tiemie, wat kort tevore op die veld gedraf het. Tiemie het toe na bewering vir Kemp te lyf gegaan.

Oudtshoorn se spelers het vinnig tot Kemp se redding gekom en Tiemie onder bedwang gebring. Kemp het die wedstryd daarna afgeblaas omdat die gemoedere hoog geloop het en hy bang was iemand kry seer. Oudtshoorn se spelers het toe vir Kemp van die veld af begelei. (more…)

DIE SA Nasionale skopbokskampioenskap, wat Saterdag, 22 Junie, in die De Jager Sportkompleks plaas-vind, is een van die hoogtepunte van die Oudtshoorn Sportfees wat van Vrydag, 21 Junie, tot Sondag, 30 Junie, in die Groter Oudtshoorn plaasvind.

Die sportfees wat die afgelope paar jaar baie suksesvol in die wintervakansie op Oudtshoorn aangebied is, skop volgende Vrydag met die Wes- en Oos-Kaapse skaakkampioenskap by Aurial Kollege af en duur tot Sondag, 23 Junie. Skaak by die sportfees is ’n eerste vir die fees. (more…)

DIE roete van die 2013 Bridge Cape Pioneer Trek, wat van 20 tot 27 Oktober vanjaar in die Klein Karoo en omringende gebiede plaasvind, is Dinsdagaand tydens ’n onthaal in Kaapstad bekend gestel.

Die Pioneer Trek, wat vanjaar die vyfde keer plaasvind, is een van enkele weeklange bergfietsrenne in die wêreld, en lok nie net top-Suid-Afrikaanse bergfietsryers nie, maar ook van die beste internasionale ryers.

Volgens Henco Rademeyer van Dryland Event Management wat die fietsren organiseer en aanbied, pas hulle die roete elke jaar aan om te verseker dat daar altyd nuwe uitdagings vir die deelnemers is. (more…)

’n Rugby-afrigtingskursus wat deur 78 afrigters van die Karoostreek, skole en klubs het Vrydagmiddag en -aand ’n rugbyafrigtingskursus by Langenhoven Gimnasium bygewoon. Onder diegene wat daar was, is (van links) mnre Rynhard van As, spanbestuurder van die SWD Arende, Hennie Baartman, president van SWD Rugby, Bevan Fortuin, oud-Springbokrugbyspeler en nuwe afrigter van die Arende, Rassie Erasmus, oud-Springbok en oud-afrigter van die Cheetahs en die Stormers, Tian Stemmet, sportorganiseerder van Langenhoven Gimnasium, en Abrie de Swardt van die SWD Sportakademie.

DIE tegniese rugbyafrigtingswerkswinkel wat Vrydagaand by Langenhoven Gimnasium onder die vaandel van die rugby-ontwikkelingsdepartement van SWD Rugby aan 78 afrigters van die Karoostreek, skole en klubs aangebied is, was baie insiggewend en ’n reusesukses, sê mnr Hennie Baartman, president van SWD Rugby.

Hy sê terugvoer wat hy van die afrigters ná die werkswinkel ontvang het, was baie positief. “Hulle het gesê dit was uitstekend en hulle glo dit sal beslis ’n hupstoot vir rugby in die streek beteken,” het hy gesê.

Tydens die werkswinkel het mnr Abrie de Swardt ’n aanbieding gedoen oor die filosofie van die rugby-afrigter en spoed in rugbyafrigting.

Me Mariette le Roux, ’n sportsielkundige, het oor die geestelike vaardighede van die rugbyspeler gepraat en Tian Stemmet oor die selektering van individue vir die span, en spankeuses van die keurders. (more…)

DIE eerstespanne van Bridgton Rugbyklub en Evergreens van George het Saterdag in ’n SWD-Premierliga-wedstryd op die Rec op Oudtshoorn met 30-30 gelykop gespeel.

Die rustydtelling was 17-16 in die guns van Evergreens, verlede jaar se SWD-Premierligakampioenspan. (more…)

VIER atlete van Oudtshoorn het Sondag die Comrades Marathon tussen Durban en Pietermaritzburg voltooi.

Hulle is Jassem Jafta en Ruweida du Preez van die RWFL-atletiekklub, albei in ’n tyd van 10:42:48, Herman Kruger van die Oudtshoorn Atletiekklub in ’n tyd van 11:05:12, en Leon van der Merwe van Hartenbos Drawwers in ’n tyd van 11:17:29.

DIE pragtige nuwe pawiljoen by die Bridgton Sportgronde word Saterdag, 8 Junie, amptelik in gebruik geneem met ’n rugbytoernooi waarin die WP in die hoofwedstryd vriendskaplik teen die SWD speel.

Mnr Ian Laubscher, sportbeampte van die Oudtshoorn munisipaliteit, kon sy vreugde en trots kwalik verberg toe hy die nuwe pawiljoen by die Bridgton Sportgronde vir Die Hoorn gewys het. Hy sê dit is vir hom ’n voorreg om ’n werk te hê waar hy projekte tot voordeel van die gemeenskap kan aanpak.

(more…)

Die eerstespan van Bridgton Rugbyklub het Saterdag in ’n naelbytstryd waarin geen genade gegee of gevra is nie, vir Barbarians, die voorlopers in die SWD Premierliga, met 30-23 pakgegee. Bridgton was halftyd met 24-12 voor.

Bridgton se vier drieë, almal in die eerste helfte, is deur Enzo Erasmus (stut), Anver Venter (senter), David Goliath (slot) en Rhupino Plaatjies (senter) gedruk. Venter het twee hiervan verdoel. (more…)

Die eerstespan van die Oudtshoorn Rugbyklub het Saterdag op die Rec in ’n SWD Presidentsligawedstryd Willing Hearts van Prins Albert met 34-20 geklop.

Jaco Terblanche, oud-SWD-stut wat as kaptein vir Oudtshoorn uitgedraf het, het ’n besliste verskil ge-maak. Hy het ’n groot rol gespeel in sy span se oorheersing voorlangs. Die paar keer wat hy met die bal op loop gegaan het, het sy teenstanders letterlik van hom afgespat.

In die eerste helfte het Alvaro de Nobrega (agtsteman), Patrick Olckers (vleuel), Marthinus Hendricks (senter) vir Oudtshoorn drieë gedruk. Charlton Prinsloo het twee verdoel en ’n strafdoel aangeteken. Heinrich Nel (vleuel) het Willing Hearts se enigste punte in die eerste helfte met ’n onverdoelde drie aangeteken. (more…)

Die Gimmies se skrumskakel, Johan Steyn, gaan oor vir een van die Gimmies se sewe drieë.
Foto: Kobus Smit

DIE eerste rugbyspan van Langenhoven Gimnasium het Saterdag met puik hardlooprugby die Hoërskool Oudtshoorn geklop met 48-16.

Die Gimmies, wat hul beste eerstespan in baie jare het, het sewe drieë gedruk teenoor die twee van die Struisies wat vanjaar ’n jong span het met baie van die spanlede in graad 11.

Hoewel Gimmies se voorspelers die oorhand gehad het, was dit veral hul agterlyn wat puik was met vyf drieë.

Die Gimmiesenter, Ruben Pieterse, het die eerste punte op die telbord geplaas met ’n drie vroeg in die wedstryd. DJ Potgieter het verdoel. (more…)

SWD FIETSRY bied van Sondag ’n winterfietsryreeks van agt wedrenne op die Ovaalrenbaan van die Oudtshoorn Motorklub aan.

Volgens die organiseerder, mnr Corné Botha, is die hele gesin welkom om met hul bergfietse aan dié nuwe byeenkoms te kom deelneem. Daar is afdelings van o.10 tot 60+. Die wenners van die verskillende ouderdomsgroepe is diegene wat die meeste punte oor die agt wedrenne verdien. (more…)

Anver Venter, knap senter van Bridgton wat ’n drie gedruk het en vier strafdoele behaal het.

DIE SWD Premierliga-wedstryd Saterdag op die Rec tussen Bridgton Rugbyklub en All Blacks was ’n harde affêre waarin geen genade gegee of gevra is nie met Anver Venter, Bridgton se senter, wat met ’n persoonlike bydrae van 17 punte die grondslag gelê het vir sy span se oorwinning met 22-10.

Bridgton het vroeg in dié derby-wedstryd druk geplaas op die All Blacks in die se helfte van die veld wat gelei het tot twee strafdoele deur Venter in die eerste tien minute om Bridgton met 6-0 te laat voorloop.

Nie lank daarna is ’n strafskop binne trefafstand aan All Blacks toegeken weens ’n vuishou deur een van Bridgton se slotte, Ruahl Lewis, wat hiervoor met ’n rooi kaart van die veld gestuur is. Gershwin Goliath, All Blacks se skrumskakel, het die strafskop deur die pale gejaag om die telling 6-3 te maak.

In die res van die eerste helfte het All Blacks twee geelkaarte gekry. Een van die daarmee gepaardgaande strafskoppe is deur Venter oorgeskop vir die halftydtelling van 9-3. (more…)

Hierdie aanraking onder die ken mag dalk gemoedelik lyk, maar die derbywedstryd tussen Bridgton en All Blacks was taai!

DIE Oudtshoorn Rugbyklub het Vrydagaand ’n spannende SWD Presidentsligawedstryd teen Collegians met 20-5 gewen. Die rustydtelling was 15-5.

Die wedstryd is in koue, nat weer gespeel wat hanteerwerk baie bemoeilik het. Oudtshoorn het gebruik gemaak van sy swaar pak voorspelers en Collegians telkens in die skrums in trurat gehad.

Oudtshoorn het eerste punte aangeteken toe hulle ná ’n lynstaan mooi gedryf en die slot Nigel Muller vir ’n onverdoelde drie oorgestuur het.

Kort daarna het Keith Meyer, Oudtshoorn se losskakel, ná briljante individuele spel oorgeduik vir ’n drie, wat ook nie verdoel is nie. (more…)

Mnr Louis Fourie, voorsitter van die Oudtshoorn Gholfklub, oorhandig die trofee aan Jaco Mortlock, manskampioen van 2013.

DIE manskampioen vir 2013 van die Oudtshoorn Gholfklub is Jaco Mortlock met ’n brutotelling van 146 punte en die vrouekampioen Celeste Barnard met 180 punte.

Die kampioenskap het op Woensdag, 1 Mei, plaasgevind.

Ruan Harmse is die junior kampioen (beste bruto telling vir ’n speler met ’n voorgee van hoër as 10).

Die seniorkampioen is Frans Cilliers.

Die uitslae van Saterdag se houespel is: Afd A : Phil Mooney (38), Jaco Mortlock (36) en Louis Fourie sr (36); afd B: PF Mooney (43), Francois Verwey (39) en Antonie Theunisson (38); afd C: Melcus Nel (36), Daniel Boks (35) en Jaco van Molendorf (33); vroue-afd B: Celeste Barnard (36) en Wanita de Villiers (31); en vroue-afd C: Leonie van Greunen (36) en Ronelle Cornelissen.